Z Chaiseraugscht gilt offiziell dr Bruuch vo dr alte Fasnacht (au Buurefasnacht gnennt), wo mit de Schmutzige Dunnschtig (Faisse) schtartet und bis am Äschermittwoch duured.
Dr Fasnachtsumzug findet jewils am Samschtig nach em dritte Faisse schtatt. Teilneh düend Wageclique, Guggemuusige, Muusiggruppe, Schissdräckzügli, Einzelmaske und Individualischte. Obwohl mir immer mehr Gruppe chönne zum Mitmache motiviere, schtoot euse Umzug im Vergliich zu andere Ort under em Motto „klein aber fein“. Schtarte duet er jewils am Nomidag nach de drei mit emene Böllerschuss und schlänglet sich aschliessend in gemächlichem Tempo durchs Dorf. Nach em Umzug gits uf em Schuelhuusplatz Gratis-Mählsuppe, bevor sich d Bsuecher in dr Turnhalle oder in eim vo de Reschtorant oder imene Cliquebeizli e Plätzli düend sichere. Bis in spötere Obe wärde nämlich überall in lockerer Reihefolg luschtigi und unterschiidlichschti Schnitzelbänk gsunge und musikalische Unterhaltig bote.
Am Mentig druff findet in dr Turnhalle im Dorf s grosse Finale schtatt. Es isch das eigentlich e Widerholig vo de Darbietige, wo am Sunnntig in de Beize teilwiis under nid grad optimale akustische Verhältnis bote worde sind. Am Mentig cha me also nomoll in aller Rueh lose, gniesse und lache. Well an däm Obe de Aktöre uf dr Bühni enormi Ufmerksamkeit gschänkt wird, vermöge sich d Darbietige vom Samschtig oft sogar nomoll z schteigere!
Am Zischtignomidag chömme denn die junge Fasnächtler uf ihri Rächnig und es herrscht bunts und luschtigs Triibe in dr Turnhalle.
Im Fasnachtsfüür, wo ufemene Floss uf em Rhy lodered, wird am Obe vom Äschermittwoch e Fasnachtspuppe verbrennt. E Bsunderheit vo Chaiseraugscht isch an däm Alass au s „Schiibeschiesse“, wo enere alte Tradition entschpricht und bsunders sehenswärt isch.
Obwohl die alti Fasnacht jo eigentlich am Äscherwittwoch offiziell ändet, findet in Chaiseraugscht jeweils nomoll e churzes Ufbäume schtatt. Am Fritig druff schtiigt nämlich zum Abschluss nomoll e Ü18-Fescht in dr Dorfturnhalle. De Alass het villi Joor under em Name Cherusball exischtiert und treit im 2012 s erschte Moll dr neui Name „Gluggsi“.